KHRISTIAN LEM

  KHRISTIAN LEM LEH SINSAKTU DIKLOU

                                          ( Pretender)

           Thukhun Thak Laisiangthou sung a Hun tawp kuan chiang akichih chiang in ‘Jesu Khrist hong painawn masung bangtan hiam ki kawksak tangpi hi.’ Himahleh Sawltak Paul in 2 Timothi 3:1 a huntawp kuan tawh kisai agelh lai in huntawp nading kipanta bang in ana gelh hi. Adiktak in Paul hunlai a thil paidan leh omdan te akhang khang in ana paitou a tunitan in leng huailai hun bang in pai tou den lai hi. Huai ziak in hiai san a ‘Hun tawp kuan’ chi a ana gelh pen Jesu Khrist mihing a hong pian apan a ahong painawn kal sung teng genna suak zaw hi. Hebrew 1:2 in, “Ahihhangin tu hun nanung ah bel, a Tapa tungtawnin thu hon gen hi. Tua atapa bel thil bangkim gouluahpa hi dinga a seh ahi a, ama’ tungtawn mahin leitung khuavannuai a siam hi,” ana chih bang zong  Paul in ‘Hun tawpkuan’ ana chih sung khawng mah huap ahi.

          Paul in thil hoihlou/gitlouh nasep bangzah hiam etsakna in ana gen a; tua sualna leh khelhna agen te pen amah hun lai mahmah a zong a omkhinta te a hi. Khelhna leh gitlouhna agen te Leitung kipat tunglai in zong ana omkhin ta hi. Hiai pen Genesis 6:5 a kigelhte ana hih ban ah Romans 5:19-31 ah kigelh te ahi. Paul in Galatia saptuam te kiang ah tua agen khelhna leh gitlouhna bawl mite’n Pathian Lalgam a mukei ding uh, na chi hi (Galatiate 5:19-31). Paul in Timothi kiang ah gingtute, thulimlouhna a kipan a akihep khiat ding uh ahi chi’n na gelh  hi ( 2 Timothi 2:19).

         Tua ban ah gingtute leh ginglou mite akibat theih na ding a om kei, ana chi a; ahihangin Saptuam heutu in kua hiam saptuam paidan nialkalh a thutak sang theilou te nemtak a ava thuhilh a va thuzawh ding in hilh hi. Saptuam heutu in bel, ‘khelhna a puuk a thilhoih lou hih kipan mite’ kisiiksak atup a bawlhoih a tup ding ahi.Himahleh huchi a mite akisiik nop keileh huaite tawh kisai hih ding neilou himai hi.

        2 Timothi 3:2-5 sunga Paul in ana gen mite saptuam pawlam a thilhoihlou khelhna nasep semte kia gen ahikei a, saptuam sung mah mah a te zong gen ahi. Adiktak in bel, Gingtu kichi ahihhang a khelhna leh thilhoihlou hih ching tei tei mite lungsima ngaihtuahna tawh agelh ahi. Hiai Khristian dikloute lawi ahi gingtute tawh ikisai khaklouh ding achih te. 1 Korinthte 5:9-11 sung thu apan in Khrist melma lauhhuai pen te saptuam sung a om hi in i mu thei hi. Saptuam sung a Khrist melma 2 lel in saptuam pawlam a melma 2000 om sang in thilpoi khoih thei zaw hi.

         2 Timothi 3:5 in mihoihloute’n Pathian mitna chikhat anei ua, diktat hi bang in akilang uh. Ahihhanga akilatsak louh uh alungtang gilou uh ziak a Kha Siangthou a sung ua teng ngei lou him him ding te hi uhi. Hiai ziak in Kha thawnpiak thilhihtheihna nei lou uh ahi. Kha Siangthou i sung a aten chiang a Kha thilhihtheihna nei kihi pan ahi. Khial leh mawh a om a Kha Siangthou i suk lungngai nilouh uh leh bel atawp a, aman hon taisan ding ahi (Paunakte 1:24-28; Isai 63:10; Efesate 4:30).

         Gingtu taktak loupi te in zong khat veivei Pathian thu ngaihnop huai leh gintaak huai tak in gen thei uhi. Khrist min zang in thillamdang tanpha zong hih thei uhi. Tua bang mite amau leh amau ‘Gingtu’ akichi ua; saptuam sung a mi dan in zong om uhi ( Tita 1:16).Hiai bang mite pen Gingtu kilem neih te, Pathian thu-awi hihna a kituam khem khem te hi uhi. Ahihhangin huntawp ni chiang in Jesu Khrist in amaute pomlou ding hi ( Matthai 7:22-23; 13:24-30, 47-50) Toupa in ama a ahi mite thei hi ( 2 Timothi 2:19).

Hiaibang te pawl in thuneihna leh thilhihtheihna dikloupi nei in zang ua, atak tak Kha Siangthou thilhihtheihna leh thuneihna pen nial uhi. A pawlam kilatdan uh et in bel Pathianmi (Kha-mi) mahmah in kilang uhi himahleh asunggil leh ataktak in Kha thilhihtheihna tha neilou in khalam thu a misi te hi maimah uhi.

          Paul hunlai leh tuhun in zong adik ahi : ‘Khristian diklou ahih kawm kawm un mi tampi khem zou uhi. Adiak in Numei ginna a piching nai lou, Laisiangthou thutak theihchetna nei nailoute  hah khemzawh diak uhi ( 1 Timothi 2:14). Huchibang numeite khelhna  luah dim ahihlai man un khial leh mawh kitheihchetna leh adik leh diklou khenkaak siamna, ‘sia leh pha’ theihna kichian nei nailoute hi uhi. Hiai bang numeite Thutak theinailou, thilhoihlou deihna na lungsim neilai leh thil thak thak pakta laite ahihman un baihlamtak a pikawi gawp in om zel uhi. Paul hunlai a numei te, sinsaktu dikloute’n lamdiklou a pi baihlam asak ziak uh bel, Pathian Thu Laisiangthou thutak theihna ding hunhoih pasalte sang a ngah tawm zaw ahih man uh ahi. Tua hunlai in numeite theih theihna tawm nei lungsim hatlou in koih uhi. Himahleh pasal tawh hamphatna kikim a numeite akikoihna gamte ah bel tua bang a baihlam tak a khem zawh hi lou uhi. Numei te khemnop i chih chih hangin, numeite mah bang a khemnop pasal zong adim-aha a om ahi chih i chiamteh ding hi.

            Thilhoihlou hihte leh Khristian dikloute zaw lungsim taktak neiloute hi uhi; tua bel Thutak thei lou, theih lah sawm tuanlou te (Rom 1:21; Efesate 4:17-18). Pathian in hiai bang mite pomlou bikbek ding ahi!!! Bang hiam hun sung hiai thilhoihlou hihte leh Khristian dikloute’n midang te khemzou maithei ua ahihhangin atawp in athilhih te uh ‘diklou/khial/mawh’ ahihna miteng muh in hong kiphoulak ding hi.

                                                          Simtu Toupa, n hon ompih hen…..