KHALAM KHAWVEL

ARMAGEDON KIDOUNA TUN DING HUN

Laisiangthou a genkholhna 9 (Kua) Armagedon kidouna kipatma kum 7 (Sagih) hun beima sung in tangtung ding hi. Hiai genkholhna te entel le hang Armagedon Kidouna anai tak ding leh agam lat lai ding suangtuah theihna tan i nei thei kha u hiam???

NO.1 Genesis 15:18 “ Tuani in Tangtawn Toupa’n Abraham tawh kal ah Thukhun abawl a: Na suante kiang ah hiai gam pekhin ka hi. Tua bel Aigupta luipi leh lui lian Iufrates lui kal.”

Daniel 9:27 “Tua ukpa khat in sagih a sim hun khat sung lel mi tampi tawh kal a thukhun a lenkip ding.Tua hun kimlai ah, kithoihna leh thillat atawpsak dinga, tua tempul’ kiu khat ah siatgawpna tun amuh thadah huai a kih huai khat atungkhe ding.Ama’ tunga tung dinga sehsa tawpna sunbuak a om dong tua bang in a om ding, a chi hi.”

         Pathian in apu uh Abraham kianga agam chiamsa sung teng mah Israel in tuni chiang in ngiatna(claim) nei hi.Leitung vaihawmtu Khrist doudalpa leh leitung gamdang te’n lem honsakpih chiang un kum 7 gimthuakna kichi tuh akipan hong hita ding hi. Hiai pen Pathian thuchiam suktangtunna kichi ding hi.Tu ni leh tu hun a Israel Primeminister in agen dan in ama sorkar in atup leh a ngim thupipen ‘ a gamgi ding uh kichian tak leitung gamte’n sehkhiaksak/ chiangtansak ding’ chih himah ahi.

NO.2 Kilakna 9:13-16 “ Tua nungin vansawltak gukna in Pengkul amut a, Pathian mai a om kham maitam ki lite apan aw khat ka za hi. Tua aw in pengkul tawi vansawltak gukna kiangah; Iufretis lui lianpi a hensa a kikoih vansawltak lite khah khia in a chi hi. Tua vansawltak lite bel Pathian in akum, akha, ani, adak adinga mansa a akoih hi uh a, tu in mihing khempeuh sehthum suah seh khat that ding in khah khiak ahi uhi. Tua ding a kuankhia sakol tungtuang sepaih pawlpi tamdan 2,000,000,000 ahi, chi a kigen ka za hi.”

      Iufretis lui asauzaw Irag gamsung hikha hi. Tulaitak in USA in hiai kuam ah sepaih 1,40,000 vel koih hi. Musalman sahkhua kulmut pawl leh USA te kingeihlouhna te’n kiamlam nawt ahi kei a a khang semsem lam hi zaw hi.

NO.3 Matthai 24:15-21 “Tuabang ahihman in siatna tunpa Pathian muhdahpa, akih huaipa, munsiangthou ah a ding ding.Kamsang Daniel in a na gen hiai pa ahi, chih a sim peuhmah in thei hen. Hiai hong tun chiangin, Judia gam a omte mualtung lam ah tai uhen. Inntunga om kuamah innsung ah van la ding in kumsuk kei hen. Lou a om kua mah in a puante la dingin inn lam delh kei hen. Tua nite in gaite leh naunou pomte’ tung gik nanchia! Phalbi lai hiam ahih kei leh Sabbath ni hiam a na galtai uh a kul louh nading in thum un. Ahang bel, gimthuakna thupi lua, leitung pianchil apan om ngei nailou, om zong om ngei nawn lou ding, hong tung ding ahi.”

    West Bank (Judea) kidoupina mun thupi pet mah hong suak ding. Ehud Olmert in West Bank (Judea) apan ka sepaihte ka la khe ding chi in gent a hi. Tua chi in a sepaihte lakhia leh Hamas Helpawlte’n Judea gam lak tum in hong kipan ding ua sisan luanna thupi tak hong om ding hi.

NO.4 Kilakna 11:1-2 “Tua nungin, tua vansawltak in tehna chiang pumping khat hon pia a; Thou inla, Pathian’ tempul, a maitam the inla tua a bete sim in. Ahihhangin tempul huang pawning nusia inla, the ken, Zentelte kianga piaksa ahi. Amaute’n kha 42 sung, khawpi siangthou a sikden ding uh.”

               Jerusalem BiakInn mual (Temple mount) pen Israel te leh Zentel te zat khawm ding in bawl lem hong hi ding. Kum 2000 kum in USA President Bill Clinton in hiai ding in proposal ana bawl ngei ta hi. BiakInn mual thu buai suk veng na ding a lampi omsun tuh hiai mah hi ding in kua mapeuh in gingta chiat hi.

NO.5: Kilakna 11:1-2 &  “ Tua nungin, tua vansawltak in tehna chiang pumping khat hon pia a: Thou inla, Pathian’ tempul, a maitam the inla tua a bete sim in. Ahihhangin, tempul huang pawning nusia inla, the ken, Zentel te kianga piaksa ahi. Amaute’n kha 42 sung, khawpi siangthou a sikden ding uh,.”

2 Thessolonikate 2:3-4 “Bang lam mah ah, kuamah’ khemzawh in omkei un. Ahang bel, puksanna om masa a, khelhna mipa leh mangthang tapa hong kilang masa louin, tua Ni hong tung lou ding ahi. Tua mipa bel, mite’n Pathian a chih khempeuh uh, ahih kei leh, a biak khempeuh uh dou in tuate tung ah amah a kitawisang ding a, amah mah Pathian kihisak in, Pathian tempul ah Pathian bangin a tu ding hi.”

      BiakInn mual (Temple mount) ah Judate Temple lamthak in hong om ding. Hiai Judate Temple 3na (3^rd) a zat ding Furniture te bawl zawh hita hi.

No.6: Temple mual pen Leitung pumpi vaihawmtu leh leitung a zat tuamtuam heutute thuneihna nuai a koih in hong om ding hi. Leitung a thuneitu lian pen ichih Khrist doupa hong hita ding a huaipa in tua mualtung a Pathian biakna paizel hon subuai ding a amah Pathian ahih ding hon ngiat ding hi. Kum 2000 in Isarel Primeinister Ehud Barak in Temple mual akitang a zat theih ahihna ding in Leitung gamte kipawl khawmna UN thunuai a koih hi leh chi in proposal ana bawl khin ta hi. UNO in temple mual tung a thuneihna ahon lak hun chiang in bel ‘ a thuneitu pen’ in (e.g UNO Secretary General) a ut bang bang hihtheihna thuneihna  hon claim thei ding hi.

NO.7: Daniel 7:23 Aman hilhchetna hon piak hiai ahi: Gamsa lina ahihleh, leitunga hong kilang ding kumpigam lina ahi. Kumpigam dangte khempeuh tawh a kibang kei ding a, aman leitung bup a negai dinga, khe a chilin a hihzan ding.”

Kilakna 13:7, “Tua vansawltak in ka kiang ah: bang hanga lamdang san a hia? Tua numei; thusim kiseel leh a tuanna, lutang sagih leh kii sawm nei gamsa’ thusim kiseel kon hilh chian ding.” Leitung gam te’n ‘Khawvel pumpi kivaihawmna dan (International Law) thunei ahihdan ahon thei sem sem ta uhi. Tuni in Sum lam tawh kisai in ‘World Bank’ I nei ua, kisumdawn tuahna tawh kisai in ‘World Trade Organization’ damtheihna lam tawh kisai in ‘World Health Organization’ thubuai saina lam ah ‘World Court’ chihte bang i nei hi. Leitung gamte kivaipuaknadan enzuitu World Court in nna sem hi.

No.8 Kilakna 13:16-18, “ Ama’n mi khempeuh aneu alian, a zawng a hau, sal hi in noplen hita leh, a khut taklam uhiam ataltang uhiam ah chiamtehna a koihsak teitei hi. Tua bel, tua chiamtehna hiam, tua gamsa’ min iam, a min nambat hiam, neiloute peuhmah in lei lah leitheilouh ding, zuak lah zuak theih louh ding, a chihna ahi. Hiai ah pilna kisam hi. Theihsiamna nei peuhmah in gamsa nambat suutkhia hen, mihing nambat ahi a, nambat 666 ahi.”

          Leitung a mihing kichi khempeuh in chiamtehna ahih kei leh number khat chiat i lei theih i zuak theih na ding in i neih akiphatmohni hong tung ding hi. May 11,2005 in President Bush in ID Act kichi ah suai ana kai ta hi. Hiai ID Act dungzui in America mi leh sa kichi peuhmah hiai ID Card neiloute’n sepna zong thei lou ding, Bank account leng hong thei lou ding chih ahi. Dik chiah! Sepna zong thei lou, leh sem theilou in koi ah sum mu in Bank account ahon apoimawh mah di hia? Sepna mulou sum muhna mulou leh Bank account nei lou in bang chi in van a lei thei mawk dia? Number omlou in na Card khatpeuh na bawl thei het kei hialta hilou maw?

NO.9 Zechariah 14:2-4, “ Ahang bel Jerusalem dou ding a keima’n namte khempeuh kaikhawm ding hivengin. Tua khawpi kila ding a, innte kibuluh ding a, numeite kipawngsual ding hi. Tua khawpi kimkhat sala kaihmanga om ding a , a sibang khawsuaksunte kia tua khawpi apan satkhiak hi lou ding hi. Tua khit chianga Tangtawn Toupa kuankhe ding a, tua namte dou ding a, galsat ni a a dou bang hi ding hi. Tua ni chianga Oliv Mual khe a sikin amah ding ding hi. Tua mual Jerusalem suah lam a om ahi.Tua Oliv mual phelnih kisuah dinga, suahlam apan tumlam dongin kiphelkhat dinga, akal ah phaijang lianpi om ding hi. Tua mual phelkhat mallam ah kikhin ding a, a phel khat simlam ah kikhin ding hi.” Ezekiel 38 & 39 sung ah zong hiai ding thu kigen hi. Leitung gamte Russia makaih leh Iran makaih pawl in Israel hon dou ding hi. Iran (Persia) leh Russia (Meshech- thumal lakkhiat a om na Moscovi ahihkeileh Moscow) te tuni in pumkhat in ding uhi. Leitung Map a Israel nulmang tum thupi pen bel Iran mah hi gige hi.

Toupa’n a Thu simtu nang a ding in vual zawl hen aw….

*CHIAMTEH DING: Zosarons a Thu leh La kikhah khempeuh ‘ADMIN’ ngaihdan hivek lou a; Thu hi in La hitaleh asuahtu in amah Thu/La suah tawh kisai ah mawh akipuak ding hi.*