DIMAPUR TAWHLET

 DIMAPUR TAWHLET

(An Independent weekly Newspaper in Zomi)

-----------------------------------------------------------------------------------------------------------

VOLUME  NO.X    NO:29  DIMAPUR TAWHLET    Noukha 20-26  ,2010  (Nov 01- Nov 07,2010 )Page-01

------------------------------------------------------------------------------------------------------------------------------------------------------------------

THU TUAMTUAM

*Dimapur a Zomi Siamsinte Kum 2011  H.S.L.C (NB) Exam ding tunitan a theihphak hiai te  hi uhi:

1.Chinglianmoi, Thahekhu.

2.Hoihniang, Thahekhu.

3.Liankhansiam, Kevijau Colony.*

*Ahongtung ding November 13,2010 (Second Saturday) nitaklam dak 1.00pm in Val-Upa.T.Thuamzakap inn, Lake View Colony, Dimapur ah ZWA Executive Heads Meeting  poimawh tak om ding. Huai hun ah Kum 2011 leh Kum 2012 Minam vaipawding teelna ding toh kisai ban ah Kum 2010 Annual Audit leh thu tuam tuam kikupkhawmna om ding a; tua hun a telkim chiat ding in General Secretary in Notice ahawm ban ah  hiai i News uh tungtawn in zong member te theihsakna bawl hi*

*Pastor V Khamvum leh Nu.Chingzanem Innsung vai toh kisai in Nov.6,2010 nitak in Manipur zuan in zinkhia uh, chih thu kiza hi*

*Pa.L.Ginzalal Ngaihte October 19 apan November 2 tan  asepna toh kisai a Training a Shillong a ava neih zawh in Nov.3 ni zingkal dak 6.00AM in Dimapur hong tung chi in muan huai tak pan thutut kingah hi*

*Nu.Jamzaching A.P  hong tung in Dimapur ah a om lel lai taka hi*

*Pa.S.Ngulzamang Ngaihte, SBI Rangapahar a sem; a Innkuante toh Fellowship Colony, Unity College geinai ah Inn luah ta uh chih thu kiza*

*EBC General Secretary Rev.L. Khamkhawlun BIBLE SOCIETY Khawmpi Dimapur a tel ding in Nov.6,2010 in hong tung chih thu kiza hi*

*Mr.Moaning leh Mr.Lanusungit ‘Motor Worker Association Dimapur leh Dimapur Private Transport Association’ min zang a zuau bawl a DMC toll gate a sum khon matkhiak in om chi uh*

KUM 50 =GOLDEN JUBILEE

Dmr,Nov 4: EBC BiakInn ana om khak ngeina khua Thahekhu a ‘Govt.Middle School’  in kum 50 mel muta. Hiai Golden Jubilee Lopna hun ah Minister for School Education and SCERT  Nyeiwang Konyak in khuallian hihna toh uap a Adviser Sericulture and corporation Azheto Zhimomi leh Congress MLA Hewoto  Awomi, School lam a official tuam tuam ban ah hiai School a Headmaster ana hi kha ngeite ban ah sinsaktu ana hikha ngei te in zong  uap uhi. Hiai School, Sinsaktu 1 leh naupang 12 toh 1960 kum a phuhkhiak a na om ahi. Tu lel in sinlai naupang 787 om a sinsaktu 22 om hi.

KHRISTIAN THILHIHNA IN

Imphal,Nov.5: Imphal a Kabui Veng minthang Chingmeirong Hausapu leh a Vi9llage Authority te’n a veng ua BiakInn kilam ding za nuam mahmah lou uh. Tua mun ah ‘Mi khat Pupa sabiak ngeina kheksak kichi kigawlkhailup toh kibang ahi’, ‘Sahkhua leh mi-hihna (identity) kikhen theilou ahi’ chih leh adang dang khawng gelhsa in va taak uhi. Kabui lawiupa khat in agen dan in ka khawte uh pawlam ah a ut ua leh a utut na Biakinn uah va kai uhen… himahleh a Thumkhawmna, Lasakkhawmna, kipawlkhawmna te uh khawsung ah hon ching kei u hen; kou tuate thuak zoulou ka hi uh.. chi top mai

dan hin chin.

POLICE TE SOISAK THU

Dmr.Nov.5(NPN): Police te soisak nung ni nih in West Police station ah Yamoni in amah soisatu Police tung a action lak ding in case bawl hi.Police in thil omdan Nov.10 ma a en chian ding sehkhia .Hiai thu tawh kisai in Yamoni innkuante soisaktu police tung a lungkimlou in sintawpni nitak in Women Cell ah va gen khin uhi. Yamoni soisak a a-om khakna pen; alawmnu–upa in alawmnu(anau) mang Chi a Police a report abawl a kipan hi’n kigen.  

GOVT. COLLEGE TEACHERS

Imphal, Nov4 : Ngetna a om dung zui in SPF Cabinet in Government College Leturer(sinsaktute) sep sung kum amau kum 62 ding in lemsakna pia hi.Hiai dan zui India State 19 lak a Manipur a 2na suak akhatna bel Mizoram ana hita. Tua ban ah UGC pay scale (khalawh) la ding in zong pha sakpih a himah leh UGC a allownce tuamtuam te pelou dia tua angah lel dan uh piak hi ding in Cabinet in lemsakna pia hi.

    Thudang ah Govt. a sum tamsem laklut na ding in Military leh Para Military te adia supply Zu te tunga excise duty tamzaw lak  ding in zong Cabinet in thukim hi’n kigen.

ASI APAN SI KAISANG

Imphal,Nov 4: Manipur Police department ah Assistant Sub-Inspector 170  Sub-Inspector a kaisang sak in om. Director General of Police in hiai toh kisai Nov. 2 in Order suah.

KUM 10 HUNGER STRIKE

Imphal, Nov 2: Imphal Tulihar Airport kiang Malom khua a Assam Rifle te’n Nov.2, 2000 a, mi 10 akaplup lai uh mukha a Sepaihte thuneihna Dan- Arm Forces Special Power Act 1958, Manipur apan lakkhiak ahih keileh sihtanpha a An ngawl dia kipan Nungak Sharrmila  anngawlhna Nov.2  in kum 10 chingta. Amah anuakna a lawh chin ma nuak zel ding, tu in Imphal Jawaharlal Nehru Hospital a Room tuam khat ah koih in om hi. Hiai ni Nov.2 in Manipur human rights group tuamtuam te’n Sharmila kiphinna AFSPA lakkhiak  agupna uh ensakin Nov.2 in daidide a tu a kiphinna nei uh.

NAGA NUMEI 6 HONGTUNG

Dmr,Nov.2(NPN): Goa a Beauty Parlour apan a hotkhiak Naga Numei 6 te damtak in Dimapur piitung hita ua; amaute anu leh pate/tanaute  kiang chiat uah poimawh dan bangkim hihfel a piak khiak hita uh,chi in I.GP S.T. Sangtam gen hi.

Editorial….

SUKSIAT DIA ET A OM TE

“Huchilou in zaw Setanin nuamtak honsa khading a hi; a tup lah i haih ngal kei ua.” 2 Korinthte 2:11

‘Setan in atup lah i haih ngal kei a!’

   Gingtute Dawimangpa in hon zawh a ut a! hon suk lungkiak a ut a! i Innkuansungte suksiat a ut hi !

   Setan in : (i) Pathian deina toh kituaklou  lunggulhna neihsak hon tum a, (ii) thulimlouhna te khawng bangmah a simlou dia hon bawl a ut a (iii) khemnate douzawhlouh ziak a thilhoih lou tuah dingte ngaihnepsak ahon tum hi.

    Thilgilou leh thilhoihlou ihih chiang a a gun agau/apaap/ a gah i lawh ding te mu thei lou ding in ahon bumhai hi. ‘Hiai douna in –na tawm ma in na tukna ding en masa in- chih thu chin hoihtak bel i nei uhi.

    Mi thil hihkhial akisiik nung na ngawn a ngaidam theilou a ahoihlouhna leh achitlouhna i zon beh nilouh leh Setan nasepna ding hun lemtang pia ihi. Tuabang dinmun ah mikhial pen “kare! Hoihzawh di hikei e” chi in lungkia in Saptuam taisan kiik in Setan-gam ah om mangthang thei hi. Huchibang lel kia hilou a Setan tup lah Saptuam dingsa phukpaih ahi ngal a! Khrist gingtu khat in mikhial kisik a ngaihdam noplouh chiangin amah ( agingtupen) thil hih khial leh suah daih mai hi. “Mite khelhna na ngaihdam ua leh ken zong noute khelhna ka hon ngai dam ding” Jesu’n ana chi hi. Setan in atup i lungsim a lut a, i sanggam, i innveng innpam leh midangte tawh kilem mawh hial a hon khawsak sak ding chih khawng ana hi thahah ahi. Tua bang in itung ah na

hon sem thei leh i saptuam sung kituahlouhna in hon khenzak ding hi.

     Unaute Pathian  thu a, Khrist a kituak diam diam a om khawm ahi, Laisiangthou in ‘HOIHNA TEL E!’ a chih. Saptuam pumkhatna i it ding huai ban a siangthouna lungtang it a i paai ding ahi. Saptuam kipumkhat pen Pathian Lungkimna ahi hi.

US PRESIDENT INDIA HONG HAWH DING

Mumbai, Nov.2(PTI): U.S.A President Barack Obama in Mumbai (Maharastra-India) hong phak na ding toh kisai in US Security agency te Helcopter, Long leh Security vanzat tuam tuam toh kalkhat bang om khin ta uh. Aman ahong phak chiang in US Govt. Official leh Thuthak saite ban ah Secret Service Agent te kigawm  mi 3,000 bang in hon zui ding uh. India ahong phak chiang in Nikhat a Sum beikhia ding Dollar 200 million  pha zou ding, India sum in Rs. 900 Crore tung zou. President Guard tatakte chihlouh official dangte galvan tawisak phal hilou mai thei State Police te President vengbit tu ding in muan huai tham ching mahmah chi in official thupuangtu in gen.

    President Obama om sung Mumbai coastline a Navy  leh Air Force te’n hoih tak a Patrolling bawl ding a thu piak in om. President ongthawl tak a hong tun theih na ding in ahong bawh ma dakkal kimkhat  in US official te tuanna te chihlouh ngal lenna dangte a ding in Lennaphual (Airport) khak (closed) hi ding.

    NSG contingent tua mun a ana omkhinsate ban ah SRPF leh Force One te President vengbit tu dia zat hi ding.

   President pu leh a Ji Michelle te zintun na ding Hotel Taj leh Lennaphual kikal lampi amau paisung teng midangte ading a khak bikbek in om ding.

MAOISTS 24 HR BANDH

Kolkata,Nov 2(PTI): US President Brack Obama in India hong veh zathadah in Maoists Central Committee in November 8,2010 ni India Pumpi bandh phuang in observe ding, chi’n MCC Member Kishenji in a omna mun theihlouh apan telephone in PTI hilh hi.

MI 68 SI

Havana,Nov 5(DPA): Passenger pua Cuba Lenna agam lailung uah tuahsia in kia a asung a tuang Gamdangmi 28 tel in mi 68 in sihna tuak hi. Tua Lenna pen ATR-72-212, Cuba’s Aerocaribbean SA Airlines te a Santiago de Cuba apan Havana zuan a lenglai Sancti Spiritus Province Cuba gam lailung a om state tung a kia ahi. Hiai tuahsiat hun Ningani nitaklam dak 5;42 vel hi in IACC in gen hi.

MI 21 SI

Islamabad, Nov 5(IANS): Pakistan simlam Karachi Lennaphual kimlak ah apaita sintawpni in Lenna neute  foreign Oil Company khat a semtu mi 21 in sihna tuak . JS Air te  lenna ahi a Karachi Airport apan alenkhiak nung sawtlou chik a buaisia a kia ahi.Lenna condition bangkim record bawl tawntung (Black Box) muhsuah hi a huai apan bang hang a tuah sia hiam chih theih theih hi ding chi in Civil aviation thupuangtu Pervez George in gen hi.

MI 67 SI

Islamabad, Nov 5(IANS): Khaibar Pakhtunkhwa Province, Kohat Town a Muslim te BiakInn (Mosque) khat Suicide Bomber khat in Bomb tailutpih a apuakzaksak ziak in mihing 67 vel in sihna tuak in mi 100 vel in liamna tuak hi. Security Officialte’n  Suicide Bomber pen Tangval kum 17-18 kal ding mi hi din gingta uhi. Misi zah kibehlap ding a ginlelh ahi; aziak bel mikhenkhat te’n damlou private etkol dia apuak khiak pawl bang zong om ahihman in. Tua bang thil tunna mun hiai san ah Damdoi a ki etkol na ding thulim omlou a, Peshwar apan Km 70 agam la ahi.

TANGKANG AH MI 113 SI

Maguwoharjo,Nov 5(Agencies): Indonesia gam a Mount Merapi tangkang in huihsa leh meiaam aphihkhiak ziak in mi 113 in sihna tuak a, mihing 160,000 te galtai in om uh.

SIMNUAM LEH OMNUAM…SIMNUAM LEH OMNUAM…

--------------------------------------------------------------------------------------------------------------------

Editor in Chief: L.Ginzalal Ngaihte                             Joint Editor   : Thangchinkhup Guite     

Circulation manager:Dongpu Tonsing                         Contributing Editor:Ginzalam Hangsing   

-----------------------------------------------------------------------------------------------------------CHIAMTEH-DING: Zosarons a Thu leh La kikhah khempeuh ‘ADMIN’ ngaihdan hivek lou a; Thu hi in La hitaleh asuahtu in amah Thu/La suah tawh kisai ah mawh akipuak ding hi.*