NANG BANG PEN IN NA MANG DING HIAM?

1.    MANGPIANNI AHIHNA BANG LIAN A LAWM DING MAW?  AHIHKEILEH  2. NEKKHAWM GUALNOP PAWI BANG DAN A NGAIHSUN A LAWM DING?  AHIHKEILEH  3.TANAU-INNKUAN KIMUHKHAWMNA HUN/PAWI A MANG DING MAW???

Kamsangpa Isai in ( Isai 9:6) hih bang in Jesu Khrist ana genkhol  hi. Tua ana genkholhna pen amataanga ana muahna, ana vaidawnna hipah hi. “Bang hang hiam cih leh eite-a’ dingin naungek hong suak a, eite’ tungah tapa khat hong kipia hi. Amah pen eite hong ukpa hi dinga,ama min pen “Lamdang Thulakpa, Vanglian Pasian, Tawntung Pa, Nopsakna Kumpi,” kichi ding hi.” Ei hong gumpa tungnungpen asangbelna a om a vanglianpen Pasian tapa eite in tawntung nuntakna i ngah theihna ding a hong pai sukpa hong suah Ni lungdamna toh i na muak a i lop kei leh bang lawm ding itazen ding hiam aw??? Hih Lungdamna Pawi i bawl kei leh bang lungdam Pawi dang om thei lai ding ai tam??? A tawntunga kah leh hagawi ding kim lai tawntung nuntakna ding lampi ong sialsakpa pian hun khengkhia a thupi bawl zawk ding eite a ding in a om peuhmah kei hi.

Leitung mihing lak a a muan huai, a suan huai leh a zahtaak huai mahmah  suahlam mipilte, Jentel hinapi un Jesu Khris  naungek piang lungdampih a lawm in Bethlehem khua ah va pai uhi. Nang Jesu Khris nang hong gumpa hong pian lopna in koisan na zuan a??? Na khua lam uh maw or Khalam Bethlehem maw??? Mipilte in naungek lungdampihna ana bawl uh Laisiangthou sung a kiteltak a i muh hinapi in pawlkhatte in Khristmas lop ding Laisiangthou ah kigelh lou ci keng kang tei tei uhi!!!

        Mipilte ban ah Luka 2:8-14 na sung ah hibangin na kigelh hi: “⁸Tua hun laitakin gamlakah a tuuhonte a giahpih tuucing pawlkhat a om uh hi. ⁹Amaute kiangah Topa' vantung mi khat hong kilang a, Topa' minthan'na vang in amaute hong taan' ahih manin a lau mahmah uh hi. ¹⁰Ahi zongin vantung mi in, “Lau kei un. Mi khempeuh a lungdamsak ding thuthak hoih khat note-a' ding ka hong puak hi. ¹¹Tuni-in David khuapi sungah, note a hong honkhia ding Khrih Topa a suak hi. ¹²Amah na theihna ding uh a lim hih bang hi ding hi: Puan tawh kitun naungek khat, gan annekna kuang sungah a kisial na mu ding uh hi,” a ci hi.¹³Tua khit phetin tua vantung mi tawh vantung mihonpite thakhatin hong omin Pasian phatna la sa uh a, ¹⁴“Van a sang belna-ah a om Pasian' min thang hen la, ama pahtak leitung mite tungah nopna om ta hen,” a ci uh hi.

Hibang teek teek a Toupa Jesu Khris  apian hun a pahtawi a na om a, lei mihingte bek hilou Van Angel te nangawn in pahtawina la ana sak uh; ei ahong tatkhiak te in La sa zaw kan lou ding ihi hiam? A hong pian lungdamna Pawi bawl zaw kan lou ding ihi hiam?

           Mihausapa in a nasem/siahlawh te kiang a Talent ahawm laitak in na pungsak un ci kawm kawm in a pia; ci in, Laisiangthou ah kigelh lou hi. Ahih hangin siahlawh apil leh kizen te in tua apu uh Dangka piak na pungsak uh a Pu uh pahtak alawh uhi. Apungsaklou a na mawk koihpa pen tungah a Pu  lungdam lou hi. Ei hong gumpa Jesu Khris pian lungdampih na dan thei lou a; phawk zong phawk lou a omte pen ‘Talent khat piak a om Lei sung a na phumcip pa’ toh akibang lin lian hi uhi. Pasian tapa ana lungdampih kici a i lungdamna i lak khiak na ding a Lungdam Pawi i bawl  kei leh alungdam ihi kei cihna hipah lian lel zel hi ve aw Guai!!! ‘LUNGDAM TAKPI NA HIH LEH KHUT BENG IN!’

       Vantungmite na ngawn in “Van asangbel na ah Pasian’ minthang hen la, amah pahtaak leitungmite tungah lungnopna omta hen…” ci a Jesu pian lungdamna thu a taangkou uh leh ahong gupkhiat eite  in i aw neih khem peuh i tha neih khempeuh toh Pasian tung a lungdam kouhna i neih ding mah hi lou ding hiam???

      Leitung mite amit theilou meilipi sung tung ding lai hong gumkhia a Vantung gam tung thei ding a hong bawl pa, Jesu Khris Pian Ni /Pian hun a lungdam Pawi i bawl ding mah ahi. Ahi zong in ‘Khrismas ci napi in; Innkuan tanau kimuh tuahna Mas! khawlui lam vehna Mas! Sa nek khawmna Mas!’ Cih khawng bang dan in thu-um, Pasian ta akici te in zangbei mawk kei ni.Kum 2011 ‘KHRISMAS’  Ei hong gumpa , Vantung gam Citizenship hong bawlsakpa, Bethlehem a naungek a hong piang Jesu Khris  hang a lungdam takpi a minthannate, Vangletnate Pa-Pasian i khuksak ni/hun hisak tek ni… Amen…

*CHIAMTEH DING: Zosarons a Thu leh La kikhah khempeuh ‘ADMIN’ ngaihdan hivek lou a; Thu hi in La hitaleh asuahtu in amah Thu/La suah tawh kisai ah mawh akipuak ding hi.*